مشاهدة تغذيات RSS

أمل فلا

الاستعداد لبداية العام الدراسى

تقييم هذا المقال
بواسطة في 02-02-2010 عند 02:42 (765 المشاهدات)
- السلام عليكم يا استاذ مغلوب ... اتفضل يا سيدى جدول حصصك فى السريع ... قولى من الحق انت محضرتش الاجتماع امبارح اللى كان عامله أستاذ غضبو (مدير المدرسة ) ليه ؟ ده قفل الدفتر على الناس اللى محضرتش

- وعليكم السلام يا أستاذ ملتزم ....كان والدى تعبان شوية واتصل بى على الموبايل مقدرتش أقعد للاجتماع ... وبعدين هو يعنى فيه جديد فى الكلام ماهو هو الكلام اللى بنسمعه كل سنة .. الدفاتر .. التحضير ... الاشراف ... وبعدين ما هو زميلى الأستاذ مكبر كان موجود ... ولا ماحضرش هو كمان؟

- طبعا ما حضرش ما هو زميلك وانت عارفه بس الناصح استاذن قبل مايمشى ...عموما ابقى عدى على أستاذ مسرور ( وكيل ) وشوف الدفتر ...يالا سلام

- ايه ده ..؟ الأسبوع كله الحصص الأولى والأخيرة ... لا ده ظلم... وكمان 24 حصة غير الاحتياطى ...هو مافيش غيرى فى المدرسة !

يدخل أستاذ مغلوب على أستاذ غضبو وهو يحاول أن يلقى عليه التحية ويحاول فتح فمه بالعافية لتظهر الابتسامة وكأنها طبيعية ويحاول أن يستشف من خلالها حالته المزاجية هذا الصباح

- السلام عليكم يا أستاذ غضبو

- وعليكم السلام يا سيدى ... خير ان شاء الله

- خير باذن الله .... أصل الجدول يا استاذ.....

- ماله الجدول يا سيدى ده أنا مريحك فيه على الآخر ... ده أنت وزميلك مكبر قاعدين طول السنة لا شغلة ولا مشغلة مش كفاية مكبرين دماغكم انتم الاتنين ومافيش حد فيكم عمل لى لوحة النشاط الصيفى فى الاجازة واضطرينا نستلفها من مدرسة البنات اللى جنبنا لحد ماخلصت الاجازة على خير

- يا أستاذ غضبو هو أنا قصرت... ما أنا طلبت من حضرتك اشترى خامات أشتغل بيها وانت عارف ميزانيتنا طول السنة ما بتجبش علبة الوان وحضرتك قولتلى منين ...مافيش ميزانية

- يا اخى حط فى عينك حصوة ملح ..ده انا مريحك طول السنة انت وزميلك ..مش قادر تعملنا حتة لوحة زى دى مش هتاخد منك تلت ساعة ... يا اخى خلوا عندكم ضمير وحللوا القرش اللى بتاخدوه بقة

- يا استاذ غضبو ... أنا...

- خلاص خلاص ...يالا يا استاذ ابدأ ظبط دفتر تحضيرك ودفتر السلوك والمواظبة وهاتهم علشان أختمهم دلوقتى حالا ...وخاللى بالك أى تأخير عن الحصة الأولى هتكون غياب أما الحصص الاخيرة انا بنفسى هتمم عليها ... يالا يا استاذ انت لسة واقف ؟

- حاضر يا أستاذ غضبو بس الحصص ...

- يا أستاذ انت لسة واقف قصادى ؟ ... يالا علشان فيه متابعة جاية دلوقتى ولازم يكون كل شىء تمام .. وابعتلى أستاذ طناش وانت خارج وقول لشكل ( العامل ) يجيب القهوة بتاعتى وبعدين عدى على أستاذ مسرور وقوله يجيب لى دفتر الحضور والانصراف دلوقتى ويقفل لى على كل اللى لسة ماجوش ....مفهوم؟

- مفهوم يا أستاذ زهقو

- هه ...بتقول حاجة يا أستاذ ؟

- لا ... أبداااااا ... بقول لله الأمر من قبل ومن بعد

أرسل "الاستعداد لبداية العام الدراسى" إلى Digg أرسل "الاستعداد لبداية العام الدراسى" إلى del.icio.us أرسل "الاستعداد لبداية العام الدراسى" إلى StumbleUpon أرسل "الاستعداد لبداية العام الدراسى" إلى Google أرسل "الاستعداد لبداية العام الدراسى" إلى Facebook

الكلمات الدلالية (Tags): لا يوجد إضافة/ تعديل الكلمات الدلالية
التصانيف
غير مصنف

التعليقات

  1. الصورة الرمزية asmaa24
    جميلة جدا
    المشكلة بقه عندنا ان المدرسة موفرة كل شئ وزميلتى مش ترضى تقولى فين الحاجة
  2. الصورة الرمزية أمل فلا
    أختى الجميلة أسماء ....زميلتك من النوعية التى سوف تصادفينها فى الاحداث الدرامية مع أبلة ( شكوى ) وأنا سميتها فى الاحداث ...أبلة (حقنة) .....أنا لا أقصد الاساءة لأحد ....ولكن أختى الغالية لابد أن تقفى مع زميلتك هذه وقفة جادة وهدديها بأنك هتبلغى ادارة المدرسة والتوجيه الفنى بأنها تخفى الخامات والأدوات عنك وبذلك لا تعطيكى الفرصة لكى تعملى وتبدعى مع الطالبات وتخرجى مهاراتهم الفنية للمدرسة .....ولابد أن تراجعى معها الخامات بنفسك وتراجعى الأسعار والفاتورة أيضا فهذا حقك وأنتى مسؤولة أمام الله عن هذا المال وهذه الخامات ...ولابد أن تقومى بعمل كشكول للخامات المستهلكة وتدونى فيه الأعمال التى قمتى بعملها بتلك الخامات وقومى بتصويرها ووضعها فى كشكول النشاط ....وقومى بتصوير الفواتير أيضا وثبتيها فى كراسة الخامات المستهلكة
    واعلمى أختى الغالية انك لابد أن تتقى الله ليس فى عملك كأستاذة فقط للمادة ...... و لكن كأمينة أيضا على مال غيرك
    وأتمنى لك التوفيق ...والهداية لزميلتك
إضافة تعليق إضافة تعليق

Trackbacks


معلومات

أقسام الموقع

الدعم الفني

مواقع مهمة





جميع الحقوق محفوظة
لموقع التربية الفنية
A r t. G o v . S a
(2001 - 2012)